Welgemoed Kunstefees

Boek en Koek is een van Welgemoed Kunstefees se gewildste geleenthede. Kom luister na Susan Booyens in gesprek met die topverkoperskrywer, Pieter Fourie (‘n Hart so groot soos ‘n vuis), en die joernalis Julian Jansen, skrywer van Seuns sonder pa’s, waar hulle gesels oor die rol wat hulle pa’s in hulle lewe, maar ook in hulle boeke, gespeel het.

Daarna volg ’n boeiende gesprek met die tema “Sonder Sonde”, waar Erla-Marie Diedericks met die bekende spanningsromanskrywer Sidney Gilroy (Bloedsomer) en Pieter Fourie (Ons skulde) gesels.

Ná afloop van die geleentheid nooi ons jou uit om te kies en keur uit koeke al die pad uit Robertson, met heerlike tee en koffie om die soetigheid te lawe

Dit is dieselfde skoolsaal, maar 43 jaar later by die reünie van die 1980-matriekgroep. Adam Boshoff tree as verteller op, maar deur die loop van die aand kry verskeie klasmaats ’n beurt agter die mikrofoon om hul sê te sê. Lank terug het almal saam ’n tragedie beleef wat hulle nou vir die eerste keer regtig konfronteer. Verwag dieselfde fyn spot, deernis en ’n tikkie nostalgie, soos net Dana Snyman en Frank Opperman kan.

Al het Carl ’n graad in konstruksiebestuur, woon hy steeds in die “blink hokke” van Rose Valley. As ’n bruin man is hy altyd laaste op die lys as dit by werk kom. Hy is depressed en Black Tax eis sy tol met die opoffering wat hy vir sy familie en gemeenskap moet maak. Die uitdagings wat Carl in die gesig staar, word treffend uitgebeeld met behulp van rymklets en poësie.

Fietsry for dommies is ‘n herkenbare en genotvolle eenmanvertoning. – Chase Rhys

Meesteravonturier, skrywer en aanbieder, Johan Badenhorst nooi ons agter die skerms in na die wêreld wat hy en sy span ontdek het met hul mees onlangse reis deur Suid-Amerika as deel van Seisoen 12 van die befaamde Voetspore-program. Van die Kaap tot Colombia, deel hy insigte oor die beplanning voor die reis, die uitdagings tydens die reis en al die juwele wat hy langs die pad ontdek het, en wat hy nou nog koester.

Jy word uitgenooi na Fuzz se verjaardag! Fuzz se hartjie is wel ’n bietjie seer, want sy maats het sy verjaardag vergeet, maar Tim, Klara en Bongi het groot planne. ’n Groot koek, ballonne en ’n verrassingsgeskenk, maar kan hierdie drie maats alles gereël kry en die vrede behou? Bongi wil ’n blou koek maak, want dis Fuzz se gunstelingkleur, Klara sê geel is mooi en helder soos die son, en Tim is vies, want niemand luister na hom nie.

Ná ’n gestry en baklei, meel wat spat en ballonne wat bars, word Fuzz verras met die beste partytjie ooit, ’n sokkerbal as geskenk en ure se pret.

Kom hou saam partytjie saam met Fuzz en sy maats, ons gaan lekker sing en dans!

Wouter van de Venter met sy rasperstem en verstommende kitaarspel, en Clinton Waring met sy fluweelstem en klavierspel, bied met hierdie musiek-ode ’n intieme openbaring van die mens agter die ikoniese status en die vriendin agter Suid-Afrika se geliefde sangeres Laurika Rauch. Aangrypende nuwe verwerkings van treffers soos “Die gang” en “Op Blouberg se strand” saam met die kore van DF Malan en Laerskool Totius, beloof om ’n hoendervel-mooi ervaring te wees en fabelagtige weergawes van onder meer “Toemaar die donker man” en “My ou tante Koba” neem gehore op ’n herinneringsreis wat die hartsnare sal roer.

Onthou jy nog vir “Bennie and the Jets” of hoe Dolly Parton gesing het oor haar “9 to 5”-lewe agter die lessenaar? Mamma Mia! Natuurlik kan ‘n mens dit nie vergeet nie. Kom luister saam na die gewilde musiek van 40 jaar gelede, met liedjies van Elton John, Dolly Parton, Abba en talle ander uitgevoer deur `n uitstekende groep musikante.

Die bekende sopraan Brittany Smith, ‘n lid van die Kaapse Opera en Sarie se Voorbladgesig van 2022, en Riaan Hunter met sy kenmerkende ryk bariton-stem kom vermaak ons in Welgemoed se indrukwekkende ouditorium met ‘n aantal pragtige klassieke stukke, met ‘n orreluitvoering deur Gerhard de Bruin.