Oppiekitaar – Jannie du Toit

Jannie net met sy kitaar op die verhoog met 'n keur uit die talle liedjies wat hy oor die afgelope halfeeu geskryf het.

Om ’n opwindende en volgepropte 2025 in te lei, beplan Jannie du Toit sy KUNSTEFEES IN DIE KLEINE vroeg in dié jaar by die Drostdyteater in Stellenbosch – ‘n week nadat dit ook in die Fairtree Atterburyteater in Pretoria aangebied word. Drie produksies – waarvan nog nie een vantevore by dié teater te siene was nie – word aangebied. Dit belowe om ’n uiteenlopende mallemeule van passievolle kwaliteit-musiek te wees waartydens uitstaande musici die verhoog met Jannie deel.
OPPIEKITAAR Soos tydens die opgewondenheid van Musiek en Liriek-in die sewentigs is Jannie net met sy kitaar op die verhoog. Dié program is 'n keur uit die talle liedjies wat hy oor die afgelope halfeeu geskryf het - 'n verrassend wye verskeidenheid van meer en minder bekende liedjies waarin vrolikheid en nostalgie afgewissel word. Sy liedkuns word deur die jare gekenmerk deur keurige tekste, vindingryke akkoordgebruik en, nou meer as ooit tevore, deur sy bedrewenheid op die kitaar. OPPIEKITAAR word om 19h00 op Saterdag 1 Februarie in die Drostdyteater aangebied.